ໂຮງໄຟຟ້າພະລັງງານຄວາມຮ້ອນຖ່ານຫີນ ທີ່ມີຜົນຕໍ່ການດຳລົງຊີວິດຂອງປະຊາຊົນ ບ້ານໜອງບົວ ແລະ ບ້ານນາເພົ້າ ເມືອງບົວລະພາ ແຂວງຄຳມ່ວນ

Coal-Fired Power Plant in Khammouan Province Affected on the Livelihood for Residents of Nongboua and Naphao Village, Boualapha District, Khammouan Province

Abstract

ໂຮງໄຟຟ້າພະລັງງານຄວາມຮ້ອນຖ່ານຫີນ ແຂວງຄໍາມ່ວນ ທີ່ມີຜົນຕໍ່ການດໍາລົງຊີວິດຂອງປະຊາຊົນ ບ້ານ   ໜອງບົວ ແລະ ບ້ານນາເພົ້າ ເມືອງບົວລະພາ ແຂວງຄຳມ່ວນ ມີ 2 ຈຸດປະສົງໄດ້ແກ່: ຄວາມຄິດເຫັນຂອງປະຊາຊົນບ້ານໜອງບົວ ແລະ ບ້ານນາເພົ້າ ເມືອງບົວລະພາ ແຂວງຄຳມ່ວນ ຕໍ່ກັບການສ້າງໂຮງໄຟຟ້າພະລັງງານຄວາມຮ້ອນຖ່ານຫີນຄຳມ່ວນ ແລະ ແນວທາງການແກ້ໄຂຜົນກະທົບດ້ານລົບຈາກການສ້າງໂຮງໄຟຟ້າພະລັງງານຄວາມຮ້ອນຖ່ານຫີນຄຳມ່ວນ. ໃນການຄົ້ນຄວ້າຄັ້ງນີ້ ແມ່ນໄດ້ໃຊ້ວິທີການຄົ້ນຄວ້າແບບວິທີປະລິມານ ແລະ ຄຸນນະພາບ. ກຸ່ມຕົວຢ່າງທັງ 2 ບ້ານ ຄື: ບ້ານໜອງບົວ ແລະ ບ້ານນາເພົ້າ ລວມທັງໝົດ 103 ຄົນ ແລະ ມີກຸ່ມເປົ້າໝາຍທາງຄຸນນະພາບ 21 ຄົນ.

ຜົນການສຶກສາພົບວ່າ: ສະພາບການດຳລົງຊີວິດຂອງປະຊາຊົນມີການຕິດພັນກັບທຳມະຊາດ ແລະ ອາໄສຊັບພະຍາກອນໃນພື້ນທີ່ໃນການດຳລົງຊີວິດ, ອາຊີບຫຼັກຂອງປະຊາຊົນແມ່ນເຮັດໄຮ່, ເຮັດນາ, ເຮັດກະສິກຳ ໂດຍການປູກຝັງ ແລະ ລ້ຽງສັດ ຕາມລະດູການ ຕິດພັນກັບການຫາເຄື່ອງປ່າຂອງດົງ ປະຊາຊົນມີຄວາມຄິດເຫັນຕໍ່ໃນເກືອບທຸກດ້ານ ຫຼາຍ ຖ້າຫາກວ່າມີການສ້າງໂຮງໄຟຟ້າພະລັງງານຄວາມຮ້ອນຖ່ານຫີນ ໄດ້ແກ່: ຜົນກະທົບດ້ານດີ ແລະ ດ້ານລົບ ຕໍ່ສິ່ງແວດລ້ອມ, ຕໍ່ສຸຂະພາບ ແລະ ຕໍ່ເສດຖະກິດ-ສັງຄົມ ອັນນີ້ກໍ່ເນື່ອງມາຈາກພື້ນຖານເສດຖະກິດດັ້ງເດີມຂອງເຂົາເຈົ້າບໍ່ດີເທົ່າທີ່ຄວນ, ລະບົບໂຄງລ່າງພື້ນຖານ ໂຮງໝໍ, ໂຮງຮຽນ ແລະ ລະບົບນໍ້າສະອາດ ຍັງບໍ່ທັນພຽງພໍ ແຕ່ກໍກຳລັງໄດ້ຮັບການພັດທະນາດີຂຶ້ນເທື່ອລະກ້າວໃນປີຕໍ່ມາ; ອີກດ້ານໜຶ່ງ ປະຊາຊົນເອງກໍໄດ້ຮັບຂໍ້ມູນຂ່າວສານກ່ຽວກັບຜົນກະທົບດ້ານລົບ ຂອງການສ້າງໂຮງໄຟຟ້າພະລັງງານຄວາມຮ້ອນຖ່ານຫີນຄຳມ່ວນ ຈຶ່ງເຮັດໃຫ້ຄວາມຄິດເຫັນຂອງປະຊາຊົນຕໍ່ດ້ານລົບກໍຫຼາຍ. ສຳລັບແນວທາງການແກ້ໄຂຜົນກະທົບດ້ານລົບກໍແມ່ນຮຽກຮ້ອງໃຫ້ປະຊາຊົນເອງ, ອຳນາດການປົກຄອງທ້ອງຖິ່ນ ກໍຄືທຸກຂັ້ນ, ລວມເຖິງບໍລິສັດທີ່ຈະກໍ່ສ້າງໂຮງໄຟຟ້າພະລັງງານຄວາມຮ້ອນຖ່ານຫີນຄຳມ່ວນ ໄດ້ເອົາໃຈໃສ່ສຶກສາ ແລະ ວາງມາດຕະການທີ່ຮັດກຸມທີ່ສຸດ ຕໍ່ກັບບັນຫາທີ່ຈະເກີດໃນ 3 ດ້ານທີ່ໄດ້ກ່າວມາຂ້າງເທິງນັ້ນ ຄື: ມາດຕະການທາງດ້ານສິ່ງແວດລ້ອມ, ດ້ານສຸຂະພາບ ແລະ ດ້ານເສດຖະກິດ-ສັງຄົມ ພ້ອມກັບນໍາໃຊ້ເຕັກໂນໂລຊີທັນສະໄໝເຂົ້າໃນການຄວບຄຸມ ແລະ ປ້ອງກັນຜົນກະທົບຢ່າງເຂັ້ມງວດເພື່ອກໍ່ໃຫ້ເກີດຜົນປະໂຫຍດສູງສຸດແກ່ຊຸມຊົນເດີມ. ພ້ອມກັນນີ້ ຍັງຄວນເບິ່ງຄືນດ້ານສະຖານທີ່ຕັ້ງຂອງໂຮງໄຟຟ້າພະລັງງານຄວາມຮ້ອນຖ່ານຫີນຄຳມ່ວນ ເພື່ອຮັບປະກັນໃຫ້ມີຜົນກະທົບແກ່ການດຳລົງຊີວິດຂອງປະຊາຊົນບ້ານ  ໜອງບົວ ແລະ ບ້ານນາເພົ້າ ກໍຄືຊຸມຊົນໃກ້ຄຽງຢ່າງໜ້ອຍທີ່ສຸດອີກດ້ວຍ.